TRANSCRIPTION :

Marie duchesse d’Orleans de Milan et de Valoys contesse de Bloys, de Pavie et de Beaumont, dame d’Ast et de Coucy, aiant la garde, gouvernement et administracion de nostre trescher et tresamé filz Loys duc conte et seigneur desdicts duchéz, contéz et seigneuries et de noz autres enfans. A notre amé et feal conseillé maistre Pierre de Refuge garde de noz seaulx et general gouverneur de toutes noz finances, salut et dilection. Nous voulons et vous mandons que par notre receveur de Bloys des deniers de sa recepte venans et yssans de la vente des boys de noz forrestz de notredict conté de Bloys, faciéz paier, bailler et delivrer à notre amé et feal serviteur et escuier de cuisine Macé de Villebresme maistre des boys et forrestz de nostredite conté de Bloys, la somme de trente livres tournoys que luy avons donnée et donnons de grace especial par ces presentes pour aucunement le recompenser des bons et agreables services qu’il nous a faiz au temps passé, fait chacun jour et encores esperres que plus fare ou temps advenir, pour luy aider à reparer et mectre à point une maison que presentement il fait faire en la parroisse de Mons en Sauloingne, et par rapportant ces presentes avecques quictance sur ce suffisant dudit Macé de Villebresme d…  eu et receu ladite somme de XXX lt, nous voulons icelle somme de XXX lt estre allouée es comptes et rabatue de la recepte de notredict receveur de Bloys par noz améz et feaulx gens de noz comptes ausquelz nous mandons que ainsi le facent sans aucun contredit ou diffaud. Donné en nostre chastel des Montilz le XVIIIe jour de juillet l’an de grace mil CCCC soixante huict.

Signé Marie

Par madame la duchesse le sieur de Mornac present

Villebres

me

TRANSCRIPTION :

Pierre de Refuge conseilléz de madame la duchesse d’Orleans, de Milan etc garde de ses seaulx et general gouverneur de toutes ses finances. Veues par nous les lectres patentes de madicte dame ausquelles ces presentes sont atachées soubz notre signet par lesquelles et pour les causes contenues en icelles ladicte dame a donné à Macé de Villebresme escuier de cuisine de monseigneur d’Orleans, la somme de trente livres tournois pour aucunement le recompenser des bons et agreables services qu’il a faiz à madicte dame ou temps passé, facechacun jour et espere ou temps advenir, pour lui aider à reparer et mectre à point une maison que presentement il fait faire en la parroisse de Mons en Sauloigne ; consentons en tant que en nous est alenterinement et acomplissement desdites lectres, en mandant au receveur de Bloys que des deniers de sa recepte venans et yssans de la vente des boys des forestz de la conté de Blois, il paie, baille et delivre audict Macé de Villebresme ladite somme de XXX lt. Ainsi et par la forme et maniere que ladicte dame par sesdictes lectres le veult et mande. Donné soubz notredict signet le XXe jour de juillet l’an mil CCCC soixante et huict.

[Signé]° Refuge

TRANSCRIPTION :

Aujourduy honnorable homme Macé de Villbresme maistre des eaues et forests de la conté de Blois congnu et confesse avoir eu et receu de Jehan Servie receveur ordinaire à Blois par les mains de Oudin Charrestier merchant des bois de ma dame la duchesse en sa forest de Blois, la somme de trente livres tournois laquelle somme madicte dame a donné audict Macé pour certains bons et agreables services qu’il a faiz à madicte dame et pour lui aider à faire certaine maison qu’il fait fère au lieu de Mons comme il puet apparoir par les lettres de madicte dame. Et d’icelle somme ledict Macé s’est tenu à bien content et paié et en a quicté et quicte ledict receveur ledict Odin Charretier et touz autres, et promis a acquicter enverstouz. Tesmoing le seing manuel de moy Jehan Callo clerc tabellion juré à Blois cy mis le vint cinquieme jour de may l’an mil CCCC soixante neuf

[Signé] Callo