Transcription :
Copie des lettres patentes du roy notresire données
A Libourne le Xme jour daoust lan mil CCCC cinquante et trois par
Lesqueles le dit seigneur a voulu le fait des aydes ordonnez pour la guerre
En la ville et ellection de Vendosme cestassavoir limposition de douze
Deniers pour livre de toutes denrées et marchandises le vintème
Du vin vendu en gros et le IIIIeme du vin et autres beuvrages
Venduz à detail avecques l’imposition fouraine estre mise sur
Et faire coutumer en ladite ellection pour ceste présente année
Commançant le premier jour doctobre mil CCCCLIII.

Charles par la grace de dieu roy de France. Aux esleuz sur
Le faict des aides ordonnez pour la guerre en lelection de Vendosme
Salut. Nous vous mandons et commectons par ces presentes que
Les fermes desdites aides de votre dite ellection, cestassavoir limposition
De douze deniers pour livrede toutes denrées et marchandises
Vendues, revendues ou eschangées le vintiesme du vin vendu
En gros et le quatreiesme du vin et autres beuvraiges venduz a
Detail avecques limposition fouraine Vous faictes crier et
Publier Et icelles bailler à ferme en la manière acoustumee
Aux plus offrans et dereniers encherisseurs agens souffisant
Bien aplegiez et caucionnez selon les instructions et ordonnances
Sur ce faictes pour lannée commançant le premier jour doctobre
Prouchain venant et finissant le derrenier jour de septemebre après
Ensuivant Et se aucunes desdites fermes demeurent [?] faictes
Les cueillir et recevoir soubz notre main pour ledit an. En faisant
Surtout bons et vraiz registres Et procédant aux payement
Des deniers desdites fermes selon lesdites instructions et
Ordonnances de ce faire vous donnons povoir commission