Transcription :
Mons. de Breves ayant cy devant escript a nostre tres sainct pere le pappe, affin que son bon plaisir feust de faire expedier les bulles necessaires pour l’esmologation de la sociation que j’ay cy devant faicte par mes lettres pattantes en forme de déclaration du xxviie decembre mvic unze de l’abbaie de Selles à la congrégation des feuillans : a quoy touteffois il a esté apporté beaucoup de longueur fondee a ce que j’ay sceu parce que l’on estime que lad. abbaye de Selle a esté cy devant unye à la congrégation de St Victor mais l’on n’a pas consideré que ceste unyon n’a esté effective, receue ny accordée par les religieux dudit St Victor comme faicte sans leur sceu ; et y ayant renoncé pour l’avoir trouvée leur estre prejudiciable, dont ilz ont donné speciallement leur declaration par laquelle ilz me remettent tout au mesme pouvoir que mes predecesseurs d’y nommer. C’est pourquoy desirant mesdites lettres estre effectuées, et veoir la pieté et devotion establye en ladite abbaye de Selle telle qu’elle est en ladite congregation des feuillans et mesmement pour la recommandation qui m’en a esté faicte par le sieur de Bethunes, je vous prie de recommencer de nouveau et vous emploier envers sa sainteté, à ce que son bon plaisir soit de faire délivrer sur mesdites lettres lesdites bulles et expeditions qui sont necessaires et ce faisant vous me ferez service bien agreable. Sur ce je prie dieu Mons. de Breves vous avoir en sa sainte garde. Escrit à Fontainebleau le xvie jour de décembre 1612
Louis
Phelypeaux

Cette lettre m’a esté donnée par Monseigneur le comte de Bethune l’an 1664.
Cette lettre est de Louis treize.